Fahasalamana

Adin’ny amin’ny Pesta Miasa mafy ny BMH

Fahasalamana
Sabotsy 30 Septambra 2017

Anisan’ny aretina iray voaresaka matetika tato ho ato ny aretina Pesta. Ankoatra ireo toerana voalaza fa nahitana izany dia mbola voakasika hatrany isika eto Antananarivo renivohitra.

Raha araka ny fanazavan’ny dokotera Durand Darys Herivonona, dokotera iray eo anivon’ny BMH Isotry ( Bureau Municipal d’Hygiène) mantsy dia Boriborintany roa eto an-drenivohitra ihany no tsy nahitana tranga nampiahiahy dia ny Boriborintany fahatelo sy ny faha-efatra. Manerana ny Nosy kosa dia nambarany fa nahatratra 104 ny tranga nampiahiahy ka ny 21 no teto an-drenivohitra saingy trangam-pahafatesana iray ihany no nahazoana fanamarinana avy amin’ny Institut Pasteur fa tena pesta no nahafaty azy. Tsy mitsahatra ny mandraraka ranom-panafody sy manentana ny isam-batan’olona araka izany ity sampandraharaha iray ity. Misy karazany roa moa fandrarahana ranom-panafody izany raha tsiahivina dia ny fanondrahana ranom-panafody famonoana mikraoba amin’ny alalan’ny fanafody HTH raha eo ihany koa ny fandrarahana fanafody famonoana ny bibikely toy ny parasy. Nahatratra roa ny razana efa nalevin’ny BMH hatreto.