Edito

Vovon’alika !

Edito
Zoma 14 Jolay 2017

Ambentin-dresaka any anaty haino aman-jery isan-karazany saika ho isan’andro ny fanaratsiana an’i Marc Ravalomanana amin’izao fotoana izao.

Ny hazo avo tokoa angamba halan-drivotra fa dia samy miteny izay teneniny izao bodo sy adala rehetra izao, ka sesilany ny fandotoana eny hatramin’ny fanompana aza efa tsikaritra ho malalaka. Omena mikro any amin’ny haino aman-jery mpanohana ny fitondrana avokoa na goaika antitra tompondakan’ny famadihana palitao sy efa mitsinjo ny fahanterany na ireo milaza ho mahay sy mahafehy ny atao hoe politika, saingy ataon’ny olona fihomehezana vokatry ny rediredin’ny jamban’ny fankahalana sy toy ireny alika tsipazana taolana ireny, raha vao raviravizan’ny fanjakana kanosa vola kely, ka dia tsy tompon’ny tenany intsony. Hatramin’ny mpanao politika efa bobongolon’ny ora sy ny fotoana sy efa nanompa an’ingahy Hery Rajaonarimampianina tamin’ny hoe soavaly be tongotra tsy misy ilana azy aza, dia nifoha tamin’ny torimasony indray, ka niverina nisolelaka sy nanao toy ny ririnin-dasa tsy tsaroana. Kabary tsy valiana ny ankamaroan’ireny rehetra ireny ary ny zava-misy ankehitriny dia toy ny vovon’alika sy ny fiherongerony.

Toky R