Edito

Volan-kakafotra !

Edito
Alarobia 13 Septambra 2017

Telo volana dia mivaha ny delestazy, handray andraikitra ny fanjakana, efa mandeha ny fanadihadiana, afaka telo volana dia hahita vokatra azo tsapain-tanana isika …

Ampahany amin’ny fampanantenana ataon’ny mpitondra HVM ireo saingy ny omaly tsy miova, toy ny volan-kakafotra hatrany ny tena zavatra iainana. Tsy mora tokoa ny mitondra firenena, saingy mba mila hita ny tena finiavana avy amin’ny mpitondra fanjakana, ary mila hitan’ny vahoaka fa tena miasa sy miezaka ny mpitondra na misy aza ny sakana. Feno fihatsarambelatsihy ny fihetsy ny mpitondra. Mirarakompana ny fampanantenana hakana ny fon’ny vahoaka, saingy na misy aza ny tanteraka dia afo-mololo hatrany fa tsy mba misy vahaolana maharitra ho an’ny Malagasy. Ny zava-dehibe amin’ny fanjakana dia ny hahazo olona afaka ny hamerina azy eo amin’ny seza amin’ny taona 2018, ka mandeha ny tambitamby sy lango malefaka. Miezaka mampiseho fa miasa ka mahavita mijapy masinina amin’ny asa vitan’ny sehatra tsy miankina. Ekena fa tsy hahavita fahagagana ny fanjakana, saingy ny andrasan’ny rehetra dia ny zavatra azo tsapain-tanana toy ny vidim-bary mihena, ny vidin-jiro midina, ny saran-dalana … Mbola nofinofy izany hatreto, raha tsy hoe hisy angaha ny fahagagana rehefa tena antomotra ny fifidianana.

Toky R