Edito

Voagadra tanteraka !

Edito
Sabotsy 24 Jona 2017

Ao anatin’ny fetim-pirenena tanteraka isika amin’izao fotoana izao, saingy toa anarany fotsiny aloha izany hatreto.

Tsy tsapan’ny Malagasy ny fahaleovantena fa fangejana sy fanagadrana no misy. Gadrain’ny fahantrana sy ny fahasahiranana efa tena tapitr’ohatra ny sarambabem-bahoaka. Etsy an-kilany, gadrain’ny fitiavan-tena tsy hita pesimpesenina ny mpitondra, ka zary fihatsarambelatsihy sy fanompana ny Malagasy tsotr’izao ny resaka fitiavan-tanindrazana aloaky ny vavany. Sesilany ny fivarotan-tanindrazana, ny fampidiran-trosa, ary kolikoly izay efa zary paikady hoenti-mitantana ny firenena. Ny vahoaka kosa etsy an-daniny, dia mahantra fadiranovana eo ambonin’ny tany ambara ho manana harena tsy hita noanoa. Resahina foana ny hoe Gasikara manankarena sy mahaleotena ary manana fiandrianana kanefa dia mbola any amin’ny rambony amin’ny lafiny rehetra. Any anaty fahantrana isika no mitana ny laharana voalohany saingy tsy hay intsony hoe manaiky hosokajiana ho efa voaozona tokoa ve, ka dia hanaiky hohitsahina hatrany an-tampon-doha mandrakariva ? Kihon-dalana hahafahana manokatra pejy vaovao hialana amin’ny gadra ankehitriny, ka anjaran’ny rehetra no misaina sy mandinika. Any amin’ny mpitondra irery no vahaolana.

Toky R