Edito

Vain-drahalahy tsy marary

Edito
Alatsinainy 31 Jolay 2017

Mbola miteraka adihevitra hatrany ny resaka fanatanterahana fisaonam-pirenena eto amintsika, indrindra fa taorian’ilay mpanakanto malaza iray,

nefa tsy nisy tamin’ireo Malagasy an-jatony maty tamina loza mahatsiravina na koa ho an’ireo mpanakanto hafa na mpanao politika nodimandry. Tsy mamoha fota-mandry sanatria fa toa tsikaritra ho tonga amin’ilay fomba fitenena hoe vain-drahalahy tsy mba maharary ny zava-misy. Sakamalaho sy havozo ka samy manana ny hanitra ho azy ny zava-bitan’ireny olona teto amin’ny firenena na ny fanandratana avo ny anaran’i Madagasikara na adidy niantsorohana teto amin’ny tanindrazana, saingy hita misy ihany ny fitanilana. Anisan’ireny ilay mpanao politika iray, izay vao nodimandry ny faran’ny herinandro teo saingy mba inona no mari-panajana nataon’ny fitondram-panjakana ho azy na dia filohana andrim-panjakana teto amin’ny firenena tao anatin’ny taona maro aza izy ? Ny Malagasy tsy miady amam-paty araka ny soatoavina hatramin’izay, saingy toa notazonin’ny mpitondra eto amin’ny firenena ho fahavalony hatrany noho ny tsy fitovian-kevitra politika ny olona sasany.

Toky R