Edito

Tsy sahy miseho masoandro

Edito
Alarobia 20 Jona 2018

Mbola tsy maina akory ny ravina nihinanana, dia efa rava sahady ny velirano sy ny fanomezan-toky natao teny an-kianja e!

Famendrofendroana izany no betsaka, mba hoenti-manao tohatra fiakarana ny valala tsy mandady harona nanantena fiovana, saingy nitatatra ho an-dRainilezafy, hoy ilay fitenenana izay. Vita ny nilana dia lasa nisintaka tsy nanao veloma akory ireo ampahana depiote nilokaloka teny an-kianja, fa tsy hamadika ny tolona sy ny vahoaka Malagasy. Dia mahana ny ratsy natao tokoa ve sanatria sa antony hafa mihitsy fa dia tsy nisy sahy nivoaka masoandro intsony. Inona indray izany izao no voambolana sy fanehoan-kevitra hoentin’ireny olona ireny handresen-dahatra ny vahoaka atsy ho atsy? Mbola sahy hiteny fa tena miray làlana amin’ny valalabemandry ary mikendry ny soa sy ny tsara hatrany ho an’ny besinimaro ve? Ny hita aloha, dia nahazo fahefana tamin’ny alalan’ny tolom-bahoaka, dia nangina sy nipirina avokoa noho ny mety fandohalihana amin’olon-tokana , dia iny olona efa tsy voakosiky ny tantara fa namotika firenena iny. Asa lahy na Ramalagasy tokoa no mora resen-dahatra, ary ampian’ilay hoe mora manadino na ahoana. Akaiky indray mantsy izao ny fifidianana, ary inoana fa tsy ho vitsy amin’ireto ampahan’olona sokajiana ho mpitazana ho mpamadika vahoaka ireto no hirotsaka. Dia hiaraha-mahita eo hoe ho mora tokoa ve ny hanasitrana ny ferin’ny fahadisoam-panantenana ?

Toky R