Edito

Partagé sur :
• facebook

Tsy milamina ny tany sy ny firenena ! Mihamafy ny savoritaka sy ny lonilony politika, ary mitana ny sain’ny maro indray izao ny fisian’ny fipoahana baomba teny amin’ny foiben’ny antokon’ny fitondrana. Iza no ao ambadika ary inona no tanjona ?

Sarimihetsika natao hamiliana saim-bahoaka manoloana ny toe-javatra hafa misintona ny sain’ny olona ve ? Tsy tongatonga ho azy ireny, ary manaporofo ny fiakaran’ny maripana ara-politika eto. Mbola hitana ny sain’ny maro amin’ity herinandro ity hatrany ny resaka savorovo eny amin’ny antenimieram-pirenena momba ny adihevitra sy fandaniana ny volavolan-dalàna mifehy ny fifidianana, ka tsy hay intsony izay mety ho fifandraisan’ireo toe-javatra mifamahofaho ireo. Valalanina ny vahoaka izay efa tena tototry ny fahantrana sy ny fahasahiranana hoe : inona ihany ity mitranga eto amin’ny firenena ity ? Ny mpanao politika tsy mety mifanara-tsaina satria baikon’ny ady seza sy tombontsoa. Ny vahoaka mitrongy vao homana ara-bakiteny, saingy toa tsy taitra intsony fa manaiky lembenana sy mora hambakaina. Malaza etsy Tsimbazaza, ohatra, ity resaka fanambazana ara-bola ny depiote hampandany volavolan-dalàna ambaran’ny hery politika mpanohitra fa mety hampidi-doza. Mety hosokajiana ho mpamadika tanindrazana ireo minia mandany izany, eny fa na ireo nanohitra aza mety hiova hevitra rehefa midangana ny volabe. Lany ihany anefa ireny rehefa tonga ny fifidianana. Malaza amin’ny kolikoly, famarotana tanindrazana, afera maloto,… ny mpitondra, saingy mety ho mbola jamban’ny vola kely tsy iray alina na dimy arivo amin’ny propagandy ny Malagasy sasany. Mila fahatongavan-tsaina haingana dia haingana !

Toky R

Tia Tanindrazana

Samia mijoro ho an'i Gasikara.