Edito

Tsy milamina e !

Edito
Alarobia 17 Jona 2015

Mihodinkodina ihany fa toa tsy misy fiovana ny toe-draharaha politika eto amintsika ! Mifanesisesy indray aloha izao ny fanambarana etsy sy eroa. Mbola mampiady hevitra ny maro ilay didy navoakan�ny HCC

. Tsy azo iadian-kevitra intsony iny fa rehefa izay dia izay. Mivoaka anefa ny resaka izao fa hoe misy mangataka fanazavana misimisy kokoa momba iny didy iny, ka asa raha hanaiky hanao izany ny HCC ka hanisy didim-pitsarana tovana tahaka ny natao tamin’ny tondrozotra. Azo antoka fa hanakorontana avy hatrany mantsy io, raha tsy hoe …efa izay mihitsy angamba no tanjona. Manahirana ny toe-draharaha, miverina indray ny adilahy politika, ka na dia tsy mbola misy akory aza ny fandravana ny antenimieram-pirenena dia efa misy ireo andian’olona manonofy sahady hahazo toerana ao anatin’ilay antenimieram-panorenana na « assemblée constituante ». Tahaka izany ihany koa ny momba ny governemanta vaovao mety hijoro, izay ambara fa ho governemanta iaraha-mitantana, hono. Dia efa misy koa ireo mieritreritra ny tenany ho minisitra. Ka inona moa izany fa tsy ny sarety no mandeha mialoha ny omby e ! Tsy milamina !

RTT