Edito

Partagé sur :
• facebook

Miha mandroso lalina any amin’ny fifidianana ihany isika amin’izao. Samy mametrapetraka ny paikadiny ny kandida tsirairay avy,

 saingy tsikaritra ihany ny resaka tsy milamina momba ny sasany. Tao ny efa hatry ny ela no nangalatra fiaingana, saingy toa tahaka ny sosoa voatapo-drano ny ekipa satria nijanona tampoka ilay famoriam-bahoaka sesilany nandaniana vola be. Efa tratry ny don-tany sy kapo-tandroka tany ampitan-dranomasina vao gaga ny rehetra fa       hay efa any ilay olona iny. “Tany am-baravaran’ny mpamosavy no nanoko sikidy”, hoy ilay fitenenana. Aiza ve ka any amin’ny olona galy fantsy amin’ny resaka demokrasia no mba miana-kendry hanome moraly, kanefa fanta-poko fanta-pirenena izao ny nafitsoka. Dia gaga ialahy, hoy ny hanihanin’ny tanora. Ny raharaha maloto mahasaringotra ny akama na izy tenany mihitsy moa dia mbola eo hatrany, ary liana ny maro hoe: ahoana ny ho tohiny ? Ny hafa indray rehefa avy nanaja tena mba ho fanajana ny lalàna, ka niala tamin’ny toerany, dia re fa lasa nitsaitsaika mangingina any andafin’ny riaka any ihany koa. Mba maka rivotra kely sa haka vatsy hiatrehana an’ity raharaha manga ity ? Toa hifaninanana mihitsy io mankany andafin’ny riaka io tato ho ato. Malaza rahateo ny lisitr’ireo kandida tohanan’ny firenen-dehibe ary re fa efa misy fifanarahana vita sonia tany ho any. Samy manana ny paikadiny tokoa angamba io ka tsy hifanomezan-tsiny be loatra. Ny mason-dRamalagasy no mila ahiratra  tsara hoe: iza no tena sahy mijoro ho an’ny firenena sy niady ary mbola hiady ho an’ny tanindrazana ka tsy manaiky lembenana eo anatrehan’ny fanitsakitsahana ny fiandrianam-pirenena ?

Toky R

Tia Tanindrazana

Samia mijoro ho an'i Gasikara.