Edito

Tsy mbola tara

Edito
Sabotsy 13 Aogositra 2016

Mety ho diska goaka araka ny fomba fiteny fa averina eto ihany mba tsy hananan-tsiny amin�ny firenena sy ny taranaka faramandimby fa misy tsy milamina ny fitantanana ny firenena, be loatra ny endrika kolikoly sy gaboraraka.

Toa manadino tanteraka ny fampanantenana natao ny ankamaroan’ireo nahazo seza. Fanaparam-pahefana ho amin’ny tombontsoan’ny tena sy ny fianakaviana no toa mahamaika ny mpitondra. Aiza ve dia misy fianakaviana manampahefana na olona akaiky ny mpitondra foana voatonontonona ao anatin’ireny afera maloto hita etsy sy eroa ireny toy ny trafikana volamena, ny rongony, ny sokatra, ny boaderozy … Misy milaza aza fa tena mivarotr’olona mihitsy amin’ny alalan’ireo tolotr’asa ho an’ny vehivavy any amin’ireo firenena Arabo. Firifiry ny minisitra, depiote, mpanolotsain’ny filoham-pirenena malaza fa be afera ary tena mampiteny ny anarany mihitsy. Tsy mbola tara raha mijoro manova izany laza ratsy izany ingahy filoham-pirenena, izy no lehiben’ireo rehetra ireo, izy no tompon’andraikitra voalohany, izy no tokony hanana paikady mahomby hitsaboana izao aretina mikiky ny fitantanan-draharaham-panjakana izao, satria raha tsy miova ny mpitarika sy ireo mpitantana dia sarotra ny hanantena fandraisan’andraikitra sy fahatongavan-tsaina avy amin’ny vahoaka. Fa rehefa mifanadala sy mifanambaka lava eto, tsy maintsy ho avy indray ny gidragidra e !

RTT