Edito

Partagé sur :
• facebook

Nosintonina ny fahazoan-dalan’ny MBS hiasa, nakatona ny masoivohon’ny VIVA any amin’ny faritra maro, nitrangana olana tampoka ny fahazoana ny TV Plus, misy ny tompon’andraikitra mandrahona mpanao gazety ary nisy mihitsy aza ny nanambana basy

 
. Moa tsy tena tandindomin-doza ny fahafahana maneho hevitra ? Voatohintohina ny fahazoan’ny olona vaovao maro lafy, ary ny raharaha atsy ho atsy rehefa tena ampiharina eto ny fampiasana ilay TNT dia vao miha hihena hatrany io fahazoana vaovao isan-karazany io noho ny fahamoran’ny fifehezana ny zavatra rehetra alefan’ny haino aman-jery eto Madagasikara. Tena ilaina tokoa ny fampiharana ny lalàna velona saingy atao am-piheverana izany ary tsy maintsy manaraka dingana maromaro. Raha misy ny olana, azo atao tsara ny miresaka fa tsy mandrahona na mampitahotra. I Madagasikara rahateo mbola ao anatina vanim-potoana miavaka ka mila fitandremana ny zava-drehetra fa tsy vitan’ny didin’ny be sandry fotsiny. Tokony handamina ny fanjakana fa tsy manakorontana, ary manolotra vahaolana ihany koa rehefa ilaina izany. Mahagaga anefa fa dia tompon’andraiki-panjakana ambony no mampifangaro ny resaka teknika sy politika. Dia tsy mety mandray lesona mihitsy ve ireo mpitondra fa saropady io resaka haino aman-jery sy fahafahana maneho hevitra io ka tsy azo terena hiditra anaty lasitra amin’izay itiavana azy fotsiny ny rehetra ? Tsy mbola tara raha mifandamina e !

RTT

Tia Tanindrazana

Samia mijoro ho an'i Gasikara.