Edito

Tsy maintsy ho tratry ny aloka

Edito
Zoma 08 Septambra 2017

Rehefa tiana hovonoina ny alika dia lazaina fa romotra, hoy ny fitenenana.

Io no fomba fiady entin’ny fanjakana HVM, hoenti-mamotika ireo kandida sy mpanao politika atahorany amin’ny fifidianana filoham-pirenena ho avy eo. Voizina ankehitriny, fa efa nohelohin’ny Fitsarana, efa nanongam-panjakana … ny mpanao politika izatsy na izaroa, izay sokajiana avokoa fa tsy ho resin’ny HVM raha mandeha ara-drariny sy ara-dalàna ny fifidianana. Hodiana tsy hita sy hikipiana tanteraka kosa fa ny filoham-pirenena Hery Rajaonarimampianina anie, ka iray tamin’ireo mpitondra 109 nohelohin’ny sehatra iraisam-pirenena tamin’ny fanonganam-panjakana ny taona 2009. Raha hifanatsikafona ny raharaha maloto teto amin’ny firenena angamba ity fanjakana HVM ity no tsy ho afa-maina voalohany, saingy mirehareha fatratra amin’ny fahefana eo am-pelantanana aloha, dia mihevi-tena tsy ho tratry ny aloka. Efa fomba fanao sy zary lasitra arahin’ny rehetra rahateo ny tenin’ilay vehivavy malazan’ny kolikoly hoe : “izahay izao ny eo amin’ny fahefana”. Raha mitohy tokoa ny hazo, lanin’ny voalavo ny lanitra, hoy ny fitenenana, ka hifampitsara eto isika aoriana kely hoe : mbola ho afaka eo anatrehan’ny onjan’ny fitsaram-bahoaka handrendrika azy ve ny fanjakana milaza azy ho matanjaka sa ho rendrika sy ho levona ?

Toky R