Edito

Tsotsorimamba isarahana

Edito
Alakamisy 20 Mey 2010

Hanao hetsika goavana ny Hetsiky ny Mpitondra Fivavahana anio rehefa avy nanoman-tena sy fo amam-panahy, nanamafy ny finoany tao amin’ny FJKM Ambohimanandray Filadelfia Ambohimanarina. Miantso ny olona ho avy maraina eny amin’ny fiantsonan’ny taxibe 194 eny Mausolée ny zandarin’ny Hery vonjitaitra eny Fort Duchesne na FIGN amin’ity anio ity. Mitokona ny mpiasan’ny Minisiteran’ny varotra. Migrevy ny mpampianatra amin’ny sekolim-panjakana. Mihisatra ny fampidiran-ketra eny amin’ny Kaominina maro manerana ny nosy, na eo aza ny fanentanana sesimotitra ny olona hanefa ny adidiny. Santionan’ny zavatra mitranga amin’izao fotoana izao eto amin’ny firenena avokoa ireo. Midika izany fa maneno sahona avokoa ny sehatra rehetra, manginy fotsiny ny tsy fandriampahalemana izay efa mihatra aman’aina mihitsy amin’izao fotoana izao. Mampiteny ny moana ny zava-mitranga. Niala tamin’ny fahanginany hatramin’ireo nambara hatrizay fa be tsy miteny, dia ny foloalindahy izany. Fambaran-javatra ratsy ireny ho an’ny mpitondra, raha tsy hoe efa tonga amin’ny tsotsorimamba isarahana. Efa nitarozaka 14 volana koa ny krizy teto. Nitondra samirery i Andry Rajoelina, tsy nahavaha olana. Nanandrana nanokatra ny governemantany izy ny septambra ary nanilika ireo akaiky azy, toa an’i Monja Roindefo, iray volana toarian’izay saingy vao mainka nikatso ny raharaha. Nanambara ny tsy hilatsaka hofidiana indray i Andry Rajoelina, nefa toa vao mainka niantso tsy fankatoavana indray izany. Mety ho izay no mahatonga ny feo mandeha ankehitriny fa dia ny fialany tanteraka eo amin’ny fitondrana no hampilamina ny firenena. Izay tokoa ve ilay hoe tsotsorimamba hisarahana !

Jean D.