Edito

Toy ny gadra !

Edito
Sabotsy 08 Jolay 2017

Na tandroka aron’ny vozona na mpitandro ny filaminana dia samy anarana nentina niantso ny miaramila taorian’ny fanjanahantany sy fony mbola tao anatin’ny fahaleovantena faha mpanjaka ity nosintsika ity.

Ho an’ny tanindrazana moa, raha tsiahivina hatrany no teny filamatr’izy ireo rehefa any anaty fianianana any. Aiza ho aiza ary amin’izao fotoana izao no fahamarinan’ireo rehetra ireo ? Ao anatin’ny firongatry ny asan-dahalo any amin’ireo faritra ahitana izany ve ? Any anatin’ireo fitsaram-bahoaka sy asan-jiolahy efa miharihary fa mitady tsy ho voafehy intsony ve ? Indrindra moa, ao anatin’izao fanagejana ireo tsy manam-basy tsy haneho hevitra toy izao mitranga ankehitriny izao ve ? Na ny fanaovana fety lojika toy ny fankalazana fitsingerenan-taona aza dia tsy azo antenaina intsony ny mpitandro ny filaminana hitandro ny filaminana ary hamela malalaka ny fanatontosana izany fa dia aleony fotsiny izao mangeja sy manafoana fifaliam-bahoaka. Inona moa izany ankehitriny no maha samihafa ny vahoaka malagasy amina gadra raha mandry an-driran’antsy amin’ny tsy fandriampahalemana sy voarara tsy hanao ity rehetra ity ?

J. Mirija