Edito

Toran-kovitra sahady !

Edito
Alarobia 05 Jolay 2017

Adin’ny kanosa sisa ampiasain’ny fanjakana HVM hoenti-mamingana ny mpifanandrina politika aminy amin’ny fifidianana ho avy.

Toran-kovitra sahady vao maheno an’ilay hoe hatao mangorom-potsy ny Kianjaben’I Mahamasina amin’ny 8 jolay. Inona no atahorana sy tsy hamelana ny fanatanterahana ny hetsika raha tena mahatoky tena ho mamim-bahoaka ? Tonga saina sy mihoron-koditra sahady fa hay ity olona sakantsakana sy hanao kapa ranjo andro aman’alina ity, dia mamim-bahoaka sy be mpanaraka na tsy mamafy vola be aza. Atao daholo izay ankasoparana rehetra, toy ny tsy famelana ny orinasan-tserasera hisokatra, saingy volamena latsaka am-bovoka, ka tsy avelan’ny tarany tsy hamiratra e ! Inona indray no atao aorian’ity tsy famelana ny hetsika etsy Mahamasina izay tsy hihemotra ity ? Ho sahy hanao fampiasan-kery ve rehefa tsy mahomby ny kajikajy mamohehitra isan-karazany. Efa naman’ny mandevi-tena tsimoramora ny fanjakana Rajaonarimampianina ary manao tsipaky ny miala aina. Mila vaniny sy mila voatsiary sisa no mba hany fialana vokony eto amin’ny firenena, fa raha izay hitondra vahaolana amin’ny fahasahiranam-bahoaka dia tsy mbola laharam-pahamehana noho ny fanaovana kolikoly sy afera maloto. Misy farany ny zava-drehetra, hoy ny Malagasy ary mizotra miadana makany amin’ny amin’ny fiafaran’ny fanjakan-jiolahy isika izao.

Toky R