Edito

Tonga saina

Edito
Talata 01 Martsa 2011

Nikoropaka i Roland Ratsiraka rehefa nilatsaka ny NOTAM mandrara ny fiverenan’ny amiraly Didier Ratsiraka, dadatoany sy ny fianakaviany, an-tanindrazana. Ny zoma 25 febroary 2011, tsiahivina ihany no nivoaka tampoka ity taratasy miendrika toromarika fanome ny mpanamory ity, mba tsy hitondra ity filoham-pirenena Malagasy tamin’ny Repoblika faha-2 ary sesitany tany Frantsa nandritra ny valo taona ity, hiverina eto. Tsy izao no nifanarahana tamin’ny 2009 raha niangavy azy i Andry Rajoelina, mba hamondrona ny hery ka haneho ny tsy fankasitrahana ny fanosihosena ny demokrasia sy ny zon’olombelona, hoy ny filoha lefitry ny Filankevitra ambonin’ny tetezamita sady filoha nasionalin’ny antoko Malagasy Tonga Saina, naneho ny alahelony ary lasa nivadi-dela ankehitriny fa tsy izany ny lalana tokony handehanana sy tokony hiarahana.

Niaiky koa moa ingahy Roland Ratsiraka ankehitriny fa na izy ao anatin’izao fitondrana izao aza tsy mahafantatra intsony ny lalana haleha. Tokony hazava ny lalana, hoy izy. Farito ny tetiandron’ny fifidianana ary mialà ao anatin’io tetezamita io izay rehetra te hirotsaka amin’ny fifidianana. Somary nanaitra ihany moa hoe, tsy vao sambany anie no nisy toe-javatra toy izao nataon’ity fitondrana FAT ity, saingy tsy niraika ny filohan’ny MTS fa rehefa niantraika tany amin’ny dadatoany ve izany ilay fanaparam-pahefana vao tonga saina izy ?

Jean D.