Edito

Teny mampisavorovoro

Edito
Alarobia 02 Martsa 2011

Ny teny frantsay no teny nampiasaina sy nifanereserana tato anatin�ny dinika famahana ny krizy isiana mpanelanelana iraisam-pirenena eto.

Nofafan’ny Fahefana Avon’ny Tetezamita tao anaty lalàmpanorenana rahateo ny teny anglisy, izay anisan’ny tenim-pirenena fahatelo teto, ary teny fampiasa amin’ny diplaomasia iraisam-pirenena. Dia samy mibadabada amin’ity tenim-bazaha ity avokoa ny rehetra tato anatin’izao fikatsaham-bahaolana hivoahana amin’ny krizy izao. Eo indrindra anefa no miseho ny olana, indrindra fa isaky ny miteny ingahy Leonardo Simao. Maro ny zava-boalazany, toa miovaova araka ny fotoana anefa izany ka eo no manalasala.

Tsy voafehiny ve ny teny frantsay ka tsy tafitany araka ny tokony ho izy ny zavatra tiany hambara ? Izy rahateo moa Mozambikanina ka ny teny portogey no manavanana azy kokoa na dia diplaomaty aza izy. Sa mazava ny zava-boalazany, amin’ny teny frantsay faran’izay tsotra, fa ny mpanao politika no mandika izay amin’izay itiavany azy avy ? Dia tsy mahagaga raha savorovoro no niafarany. Rehefa zohina dia ilay teny frantsay mihitsy no mampisavorovoro eto. Ka aiza ary ilay hoe hambom-pom-pirenena sy fitiavan-tanindrazana ?

Jean D.