Edito

Sarotra atoro

Edito
Alakamisy 11 Febroary 2016

Raikitra amin�ny volana jona indray izany ny fifidianam-paritra eto amitsika.

Efa azo sary an-tsaina indray fa handrombaka ny maro an’isa ny antokon’ny fitondrana ary hampiasa ny tetika rehetra hahatongavany amin’izany. Milaza ho manam-bola hanaovana an’io ny fanjakana, raha ny tenin’ny praiminisitra omaly. Inona indray ny fampanantenana hatao eto. Ho tanteraka amin’izay ve ny fitsinjaram-pahefana sa ahoana ? Mihodinkodina am-pitoerana ny fitondrana HVM. Tsy hita izay zava-bita mivaingana ary bedy foana isaky ny mihetsika. Angamba efa lany henatra ka tsy taitra amin’izany intsony ireo mpitondra fa mbola misy velon-tsiky ihany. Ny vahoaka anefa efa tena mijaly fadiranovana. Misy ny efa manomboka maneho ny fahasosorany fa dia kabary aloha no valin-kafatra avy any amin’ny mpitondra hatreto e ! Raha kabary no nahavoky dia efa natavy be daholo ny Malagasy. Im-piry no notairina ry zareo manampahefana fa maro be ny zavatra tsy mandeha amin’izay laoniny eto ka mila jerena akaiky sy hikaroham-bahaolana, saingy ny seho ivelany ihany no mahamaika e ! Ny kajy politika amin’io mandeha ihany. Manangana fahavalo isan-kerinandro ny filoham-pirenena, tsy fantany anefa fa amboadia mitafy hodin-janak’ondry daholo ireo manodidina azy ireo ary hiala aminy sy hamadika palitao indray rehefa raikitra ny sakoroka eto ka izy no ho tavela farany eo.

RTT