Edito

Sarimihetsika tsy mifarana

Edito
Talata 10 Oktobra 2017

Mihodinkodina ny tany. Fomba fiteny sy fomba fijery izany. Saingy miverina boribory daholo angamba amin’izao ny zanak’atidoha sy ny tsikalam-pieritreretana manoloana ny zava-miseho ka mahatsiaro ilay tononkira hoe mahaiza fetsifetsy sao hianjera sy hikodia eto amin’ity tany ity.

Ny eto an-tany mety mbola hisy azo hiarenana ihany fa ny eto amin’ity nosy ity kosa no mba ahoana ? Raha atao kisarisary dia toa iny ilay nosy fa nikodia ary rehefa mba niezaka niarina dia mbola nisy nampitotongana indray ary dia toy ny satrin’ny tsy mataho-tody hatrany ny hamarina azy hatrany an-kady mihitsy. Ekena tokoa fa saika miverimberina isan-taona eto ny aretina pesta saingy maninona no tsy mety fongotra ? Fantatra fa mambotry firenena ny kolikoly saingy maninona no tsy foin’ny ankamaroany ? Handova dezaka, hono, ny taranaka amin’ny firongatry ny fanaovana tantely afa-drakotra ny harem-pirenena saingy maninona ary ny trafika etsy sy eroa no tsy mety mifarana ? Dia toa miteny foana izay mpiteny, manohitra hatrany izay milaza azy hoe mpanohitra. Sao lahy isika mianakavy ity ka mpilalao sarimihetsika daholo ? Sarimihetsika tsy mety hifarana no lasa iainana eto ka sady tsy hampidi-bola no handany ny fananana rehetra. Ny tena ho loza dia sanatria ho lafo ambongadiny koa isika mpilalao sy mpamokatra. Aza misy anie izany !

J. Mirija