Edito

Samy manana ny problemany

Edito
Alatsinainy 21 Jona 2010

Sahiran-tsaina ny FAT, ny sazy tsy afaka, ny vola tsy azo, izao tontolo izao mila hanao fahirano an’i Madagasikara. Antomotra indray ny datin’ny 26 jona, mitombo ny fahasahiranan-tsain’ny FAT amin’ny fandresen-dahatra ny Malagasy hanangan-tsaina. Miasa loha ihany koa mitady ny fomba rehetra atao mba hamparesaka ny fankalazana ny faha-50 taonan’ny fahaleovantenam-pirenena. Ny Malagasy 20 tapitrisa mitaitain-dava amin’ny tsy fandriampahalemana ny eny ambanivohitra, miady saina amin’izay harapaka isan’andro ny aty an-drenivohitra. Probleman’ny mpandraharaha indray ny adisanina samihafa mba hitohizan’ny asa fihariany, ho fitazoman’aina. Ny mpanao politika, hafa koa ny problemany, ny mahazo fitondrana mifikitra mafy amin’ny seza, manao izay fomba hijanonana ela eo, ny mpanohitra tsy mipetra-potsiny fa mitady fahefana ihany koa. Fianakaviana maro no mitaintaina ny amin’ny havany mila ravinahitra any Liban any, eo anatrehan’ny fahenoana fa mila ho isan-bolana no misy Malagasy mamoy aina na very saina na iharan’ny herisetra any. Any Afrika Atsimo, kitra eto no resaka, hafa koa ny problemany dia ny hahazoana ny amboara eran-tany sy ny volabe manaraka izany. Raha akapoka dia tsy eto ihany fa samy manana ny problemany.

Jean D.