Edito

Samy manampatra

Edito
Alarobia 12 Oktobra 2016

Ny andaniny manampatra fahefana, ny ankilany kosa izany manampatra fahantrana. Dia samy mifanampatrampatra amin�izay tiany hanamparana eto isika mianakavy.

Mampivarahontsana ny mandre fa olona iray amin’ny zato no mahazo fahafaham-po amin’ny raharaham-pitsarana ao Ambovombe ary manjaka ao an-toerana vokatr’izany ny fitsaram-bahoaka. Manampatra ny tsy fahatokisany ireo tokony ho andry iankinan’ny fahafahany araka izany aloha ireo mponina any an-toerana, izany hoe, manampatra ny fahantrany ara-pahalalahana. Ny eo amin’ny fitondrana amin’io mba manampatra ny fahefany koa amin’ny fangejana ny asa fanaovan-gazety ka zara raha manome vaovao sahady mikasika ilay fihaonam-be iraisam-pirenena ery Ivato ery. Tsy lazaina intsony moa ny fanaovana be marenina ataon’izy ireo amin’ireo karazam-pitokonana miseho etsy sy eroa satria efa voafantsika eo amin’ny seza daholo. Manampatra hatramin’ireo mpivarotra amoron-dalana erak’ireo renivohim-paritany satria efa maro ireo mihevitra fa eto tsy misy tany tan-dalàna izany. Dia asa moa izay hiafarany fa ny hirariana fotsiny dia ny hoe enga anie isika samy manampatra io mba ho tonga saina mialoha fa tsy sanatria hiampatrampatra eto rehefa samy ho voa.

Faralahimatoa