Edito

Samy hibaiko ny azy

Edito
Alatsinainy 10 Septambra 2018

Miova ny tantana eto amin’ny firenena taorian’ny nialan’ny filoha teo aloha tamin’ny toerany ny takarivan’ny zoma 7 septambra lasa teo.

Tsy misy olom-boafidim-bahoaka intsony aloha izany eny amin’ny faratampon’ny fitondrana ny firenena, fa olom-boatendry avokoa na i Ntsay Christian na i Rivo Rakotovao. Na hilaza ho tsy baikon’iza na iza aza, dia samy manana ny lehibeny na ny patraony, raha tarafina amin’ny fototra niaingany. Mety samy hanamboatra sy hanatanteraka ny baiko politikan’ireo lehibeny avy, izay samy kandida filoham-pirenena, dia i Andry Rajoelina sy Hery Rajaonarimampianina. Mampiahiahy hatrany ny resaka fampiasana ny fahefam-panjakana ao anatin’ity raharaha ity satria io no fomba mahomby indrindra hahafaha-mangala-bato, ohatra. Hikoha-maina aza hatao mainka tokoa, fa hisy sery hanilahana, ka tsy atao mahagaga raha misy kandida mamondron-kery sy mivoy ny hoe : ravao any mihitsy aloha io governemanta io ary aleo samy miditra ao satria tsy ho lany e ! Ny kandida sasany indray moa efa mahatoky ny heveriny ho heriny sy fitiavam-bahoaka azy ary mandeha amin’ny fahitsiana, fa ao ireo efa miantehatra sahady tamin’ny propagandy mialoha ny fotoana, ny fahefam-panjakana,… Asa lahy izay hitranga ? Tsy maniry loza fa raha dinihina, dia an-kevitry ny hikorontana ambony ambany i Gasikara raha izao fandehany izao ! Aza hitako aza mahita ahy indray, hoy isika Malagasy izay !

Toky R