Edito

Partagé sur :
• facebook

Repoblika 4 izay no nandalo fa tsy mbola nisy toy izao. Hafa kely ity fitondrana indray mitoraka ity saingy tsy mba hafa kely amina zavatra nahafinaritra sy nitondra filaminana na fiadanana ho an’ireo vahoaka napetraka ho eo ambany fiahiny fa dia tompondaka tamin’ity karazan-java mahamenatra sy nampivarahontsana rehetra ity.

Vao nanomboka nandray fahefana dia nisantatra ra mandrika rehefa avy nanatontosa kabary dika mitovy tamin’ny an’olon-kafa. Nandeha ny fampanantenana, ilay nalaza indrindra, fa 3 volana ihany no fetran’io fahatapahan-jiro lavareny io kanefa inona akory no teo! Mbola nitohy tamina ra mandrika koa avy eo ny fetim-pirenena. Sambany teo amin’ny tantaran’ity nosy ity no nisy trangana asa fampihorohoroana sy fikasana nanatontosa izany. Ny andiam-basy marovava tra-tehaka tao Nosy be, ny raharaha kariera tany Anjozorobe, ny tifitra variraraka nahazo ireo mpandeha tany amin’iny faritra iny ihany sy ny hafa tsy voatanisa. Sambany avokoa, tato anatin’izao fitondrana izao no nirongatan’izany. Tsy lazaina intsony moa ny tsy fahazavan’ny raharaha Razaimamonjy sy Antsakabary, ny tarehimarika diso be momba ny resaka tsena-barom-panjakana, izay mbola nahasahian’ny minisitra tomponandraikitra nametra-panontaniana ihany hoe izany koa ve dia tsy fahaizana miasa? Ny fitonatonanan’ny minisitry ny raharaham-bahiny milaza ny tsy tokony ho lazainy tany an-tanin’olona. Nialoha lalana azy tany Roma rahateo moa ny filoham-pirenena ka izay tokoa angamba no tonga amin’ilay fitenenana hoe miainga avy any ambony ny ohatra. Sambany avokoa izany ka enga anie tsy hiverina intsony.

J. Mirija

Tia Tanindrazana

Samia mijoro ho an'i Gasikara.