Randrianantenaina José

Partagé sur :
• facebook

Maneho ny heviny momba ny raharaham-pirenena ny kandidà solombavambahoaka ao amin’ny Distrikan’Antsirabe faharoa. Mitondra ny laharana faha-6 amin’ny biletà tokana, Atoa Randrianantenaina José Antonio, natolotry ny ankolafy Ravalomanana manoloana ireo kandidà maro milaza ho manohana ny Dr Robinson Jean Louis. Dinidinika.

Tia Tanindrazana (T.T) : Marobe ireo kandidà toa anao milaza fa hanohana ny kandidà izay notohananareo tamin’ny fifidianana filoham-pirenena fihodinana voalohany ?
Randrianantenaina José (R.J) : Marina tokoa fa roa sisa ny kandidà filoham-pirenena hifaninana amin’ny fihodinana faharoa izao. Mazava ho azy fa samy mitady izay handreseny ireo, ary hitady ny maro an’isa ihany koa amin’ny solombavambahoaka. Raha ho anay aty amin’ny ankolafy Ravalomanana dia tsy ho toy ny ranon’Ikopa izahay fa ho toy ny ranon’Andraikiba ka tonga namana vao mangamanga. Izahay no nanaiky voalohany ny fanohanana io kandidà io ny fihodinana voalohany raha toa ka maro no nisalasala sy natahotra tamin’izany, no sady tsy natoky noho ny zava-nisy teto amin’ny firenena sy ny teritery samihafa. Amin’izao fotoana dia misokatra ny lalana ho an’ny fandresena ka betsaka indray ireo milaza fa hanohana, ka tsy izahay mihitsy no hisakana ny fampandaniana ny kandidà Dr Robinson.

T.T :Tsy hampisafotofoto ny sain’ny olona ve izany, indridra amin’ny fifidianana solombavambahoaka ?
R.J : Fifaninanana masina io ka ny vahoaka no aoka hitsara satria samy hihaona sy hitafa amin’ny vahoaka avokoa ny kandidà tsirairay. Ny tsara hotadidiana fotsiny dia izahay tao anatin’ny ankolafy Ravalomanana izay miaraka amin’ny filoha Ravalomanana, tsy nivadi-belirano hatramin’ny taona 2009, ary sahy nanohitra hatrany ny fitondran’ny mpanongam-panjakana dia mbola hijoro sy hiaro hatrany ny fahamarinana izay nijoroan’ny filoha Ravalomanana amin’ny asa izay hiandraiketanay.

Atoa Randrianantenaina José Antonio

Tia Tanindrazana

Samia mijoro ho an'i Gasikara.