Edito

Ozona sa fandraikiraikena ?

Edito
Alakamisy 08 Martsa 2018

Mahagaga ihany ny fihetsiky ny Malagasy manoloana ny zava-misy ankehitriny. Niakatra avo roa heny ny vidim-bary fa tsy nahataitra azy.

Nihoatra izany ny fiakaran’ny jiro sy rano fa tsy nahataitra. Miakatra koa ny solika fa tsy taitra. Tsy miakatra ny karama. Ny an’ny sasany aza nidina na tsy nomena intsony mihitsy fa tsy taitra. Aiza ho aiza amin’izao ny tamin’ny taona 2009 raha narentinrenty fotsiny ny loko volomboasary ary nolazaina fa mpanao jadona ny mpitondra tamin’izany raha sendra nisolifatra kely ? Tonga dia takona tampoka daholo ireo lalana an-kilaometatra maro vita rehetra sy ny fahalalahan’ny vokatry ny tantsaha mifamezivezy manerana ny faritra ary ny fidinan’ny taham-pahantrana fa dia andao hoesorina any io fa efa iny ny « bogosy » hasolo azy. Ninia nikipy na dia efa hita izao fa efa tsy manara-dalàna intsony aza ny zava-miseho. Mba lojika ve ny hoe mialoha ny ipitsihana vavahady dia nivavaka ? Ilaina sy maha vanona ny manara-dalàna saingy moa va manara-dalàna isika ankehitriny ? Tsy sanatria mihantsy hikomy akory fa dia tokony hipetra-potsiny koa ve anefa ? Ozona sa fandraikiraikena no manjo ?

J. Mirija