Edito

Oui M�s� !

Edito
Alakamisy 12 Aogositra 2010

Nangalatra volabe ny filoha hividianana ny “Air Force One”, hoy i Andry Rajoelina teny amin’ny kianjan’ny demokrasia Ambohijatovo ny janoary 2009. Dia hoy ary ry zareo hoe hamidy ny “Air Force One II” ary hozaraina amin’ny Malagasy ny vola azo amin’izany. Efa nilaza mazava anefa ny tomponandraikitra teo aloha fa ilaina hamitan’ny filoha iraka eran’izao tontonlo izao hitadiavam-bola hampandrosoana an’i Madagasikara sy hampivoarana ny fiainan’ny Malgasy io fiaramanidina raitra io, amin’izay tsy voatana ny fiaramanidin’ny Air Madagascar fa afaka mampidi-bola amin’ny fitaterana ny mpandeha. Ankoatra ny fialonana dia tsy nanaiky izany mihitsy i Andry Rajoelina sy ny namany ary ireo mpanao politika sakaizan’ny mpandresy niara-dia taminy. Inona anefa ny zava-misy nony avy norombahin’izy ireo an-keriny ny fitondrana ? Nampiasa ny fiaramanidin’ny Air Madagascar i Andry Rajoelina ka nanodina izany nankany Dakar (Sénégal) raha tokony hihazo an’i Paris.

Maty antoka mafy ny orinasam-pitaterana Air Madagascar ary ny mpandeha tsy afaka nampiasa ny sidina ara-dalàna. Nony hitany fa tsy nety izany dia nanofa “jet-privé” ana Karana izy ka io no nentiny namonjy ireny fivoriana tany Maputo sy Addis Abeba ary Pretoria ireny. Arahina olona maro izy ireny ary andaniana volabe tokoa. Nokianina mafy koa ny filoha Ravalomanana fa nanampi-bava tao amin’ny RNM sy ny TVM. Raha misy anefa ny sonia nanamarika ny fahatongan’ny FAT dia fahamaizan’ny RNM sy ny TVM, ny naha kila hotohoto ny MBS narahin’ny fanakatonana ny radio Mada sy ny radio Fahazavana an’ny fiangonana FJKM ary fampidirana am-ponja ny mpanao gazety, izay zavatra tsy nisy mihitsy teo amin’ny fitondrana Ravalomanana. Manizingizina anefa ny FAT sy ny mpanohana azy fa malalaka ny mpanao gazety eto Madagasikara, nefa dia herisetra, horohoro ary fandrahonana no betsaka, atao amin’ny mpanao gazety. Ary mandrak’ity ny anio mbola misy mpanao gazety enina be izao any am-ponja.

Nolazaina ihany koa fa nanao ampihimamba ny filoha Ravalomanana tamin’ny vokatry ny tantsaha. Ny tantsaha anefa no nahazo tombony tamin’ny asa nataon’ny TIKO, fa ireo tsy mahay mitantana ka resy tamin’ny fifaninanana, dia nailiny tany amin’ny politika ny tsy fahombiazany, nefa orinasa efa nisy hatrizay ry zareo fa tsy nivoatra mihitsy. Ny frantsay ohatra mbola tena nibahana eo amin’ny sehatry ny vola, ny banky, ny fiarakodia, ny solitany ... fa aleo nanenjika ilay Malagasy satria toe-tsaina voazanaka ka ny vazaha atao hoe : “oui M’sé”, ary ny Malgasy kosa ringanina satria nahazo vola kely. Jery maika ihany ity satria taitra ny tena naheno fa tsy misy olana, hono, eto Madagasikara, ary tsy nisy niady. Nofinofy fotsiny mantsy ireo maty sy maratra ary gadra sy very asa an’arivony maro.

Jean D.