Edito

Partagé sur :
• facebook

Lasa resabe indray ny savorovoro tetsy amin’ny lapan’ny antenimieram-pirenena Tsimbazaza omaly.

 Niteraka korontana sy adihevitra ny resaka fandaharam-potoana sy ny olona afaka nanatrika izany, ka saika niafara hatramin’ny ady totohondry teo amin’ny samy solombavambahoaka aza. Nampisavorovo sy lasa olana ho an’ny solombavambahoaka mpomba ny fitondrana HVM moa ny fanatrehan’ny mpanao gazety ny fotoana, ka dia raikitra ny sakoroka, ka nantsoina hatramin’ny mpitandro ny filaminana handamina. Nisy mihitsy ny tsy nahafehy tena sy toa tsy niraharaha intsony ny haja amam-boninahitra ananany amin’ny maha olom-boafidy azy, ary tsy mendrika akory amin’ny maha solombavambahoaka ny vava navoakany. Vitan’ny depiote Rabetafika Roberthine voafidy tany Matsiatra Ambony iny ny nanompa sy nanivaiva ny mpanao gazety ho maimbo helika. Tsy manan-tahotra amin’ny vava havoaka ve satria akaiky ny fitondrana sy mirehareha amin’ny fahefana ? Olom-boafidy manana ny maha izy azy sa olom-boavidy baikoina hanaotao foana ? Teny an-toerana ny minisitra iray tokony hiaro ny mpanao gazety, saingy tsy hay na mety aminy ireny na hisy ny fanamelohana hataony, fa ny mpanao gazety rehetra tonga teny an-toerana kosa dia tofoka sy nanameloka ity farany. Manala baraka ankitsirano ny andrim-panjakana misy azy. Hisy ve ny fanamelohana hataon’ny antenimiera sa homena rariny ny fanivaivana sy fanompana ny mpanao gazety satria manelingelina ny hafa ? Inona ihany koa ny zavatra kimaizimaizina tiana hafenina ao anatin’ny raharaha, ka hanaovana roaka alika ny mpanao gazety ? Mila lalao madio sy mazava dia milamina ny raharaha raha tena ampiharina tokoa ilay hoe lapan’ny demokrasia e !

Toky R

Tia Tanindrazana

Samia mijoro ho an'i Gasikara.