Edito

Ny manantena tsy misy no sarotra

Edito
Alatsinainy 20 Aprily 2015

Tena tsy mbola matoky ny fanjakana malagasy ve ny mpamatsy vola fa ny mpitondra no mbola tsy te hiaiky ?

Noho ny tsy fahampian’ny vola enti-mikarakara ny fifidianana Ben’ny tanàna dia nanambara ny mpiara-miombon’antoka amin’i Madagasikara fa tokony hahena ny tetibolan’ny CENI-T hoentina manatontosa izany fifidianana izany. Rava hatreo ve izany ilay fampanantenana hoe manana mpanohana isika ? Amin’ny fanarenana ny orinasa Jirama dia efa nanambara izao ny solontenan’ny Banky eoropeanina momba ny petra-bola sy ny solontenan’ny Vondrona Eoropeanina fa hanokana valopy hanampiana an’i Madagasikara amin’ny fanafoanana ny fahatapahan-jiro lavareny raha nihaona tamin’ny jeneraly Jean Ravelonarivo, praiminisitra lehiben’ny governemanta kanefa aiza ihany hatramin’izao ? Ny delestazy any amin’ny faritra efa mampiteny ny moana. Izay ihany koa ve izany no dikan’ilay antso nataon’ny praiminisitra amin’ny mpamatsy vola ireny fa tena manampin-tsofina ry zareo. Ny filoham-pirenena tany Tolagnaro dia mbola namerina fa tsy maintsy hatao ny fanamboarana ny lalam-pirenena faha-13 mampitohy an’Ihosy sy Tolagnaro. Nampanantena hanome an’io vola io tokoa ny Vondrona Eoropeanina kanefa aiza hatramin’izao ? Dia hatramin’ny rahoviana isika no miandry eto ? Ny manantena tsy misy no sarotra !

Andry Ratovo