Edito

Ny lohany indray no matsatso !

Edito
Alarobia 10 Mey 2017

Ny fary no azo atao fanoharana mikasika ny toetra sy ny fomban�ny mpitondra ankehitriny, ka tonga amin�ilay fitenenana hoe ny lohany indray no matsatso.

Ny filoham-pirenena izay heverina fa tokony ho angady hahatapak’ahitra manoloana ny savorovoro miseho eto amin’ny firenena ankehitriny no toa misitri-belona sy tsy te ho tompon’andraikitra manoloana ny zava-doza maro miseho, raha tsy hilaza afatsy ny kolikoly mahavoatonona ny anaran’ireo olona akaiky azy. Efa ela no nanaovan’ny herivelona maro teto amin’ny firenena ny handraisainy andraikitra sy hilazany ny heviny, saingy ny henoy izany ry hazon-damosiko no setriny. Ny praiminisitra izay milaza azy ho hentitra amin’ny fampanarahan-dalàna ny olom-pirenena toa efa ela ihany no nilaza handray andraikitra kanefa izy aza toa malaza ratsy ho mpiray tsikombakomba amin’ny mpanao kolikoly, ka dia anarany fotsiny no lohany fa toa matsatso e ! Ny solombavambahoaka sisa no hany fanantenana hitondra ny hevitry ny maro ka hitsipaka sy handrava ny governemanta efa hita fa tena tsy mahavita ny adidiny. Tsy hay anefa na mba hihaino ny feon’ny fieritreretany sy hitodika amin’ny vahoaka izy ireo na hivarotra fanahy, ka hijanona ao anaty sokanin’ny lohany matsatso toy ny fary ihany koa.

Toky R