Edito

Ny ahiahy tsy hihavanana

Edito
Alakamisy 10 Aogositra 2017

Omaly moa izany no nanomboka nampahafantatra am-pahibemaso ny vinan’asany ao anatin’ny fampihavanam-pirenena kasain’izy ireo ho tontosaina eto ireo kandida maniry mba ho isan’ireo ho mpampihavana 44 mianadahy eto amin’ny firenena.

Sarotra hono ny fanivanana azy 220 mianadahy izay niatrika izay fanadinana tetsy Anosy izay omaly ary hita fa tena manan-karena olona mihitsy hono ity Madagasikara ity. Izany tokoa ve? Koa tsy tokony efa tontosa hatry ny ela be ary ve izany ilay tena fampihavanam-pirenena tadiavina raha izany marina no izy? Fanim-piriny amin’izao moa izany no niova io hoe komity isahana ny resaka fihavanana io kanefa dia mbola mijolofotra foana hatreto? Efa heno sahady nanomboka iny omaly iny fa misy ambadika ihany koa, hono, na dia io resaka fampihavanana io aza, raha ny fanehoan-kevitra an-tariby iray. Sao lahy dia ny efa tonta ihany no mbola avadibadika amin’ity raharaha ity ka ny Kotozafy ihany no Leksisy ary ny Raiamandreny najoro teo aloha ihany no mbola hajoro? Ny ahiahy tsy hihavanana a ¡

J. Mirija