Edito

Partagé sur :
• facebook

Tsy hita tabilao ary tsy nandrenesam-peo mihitsy ny komandy ambonin’ny zandarimariam-pirenena, ny jeneraly Bruno Razafindrakoto omaly na dia teo aza ny fifampitifirana teo amin’ny FIGN sy ny FIS notohanan’ny Emmo Reg. Raha ny tsiliantsofina re dia tsy eto an-toerana mihitsy fa toa hoe lasa nivoaka any ivelany ity manampahefana ity. Somary nanaitra ny rehetra ihany izany satria ao anatin’ny vanim-potoana mavaivay tahaka izao mihitsy no tena ilana ny tompon’andraikitra, mba hanazava ny sain’ny vahoaka sy hilaza ny tena marina. Ny FIGN rahateo dia ao anatin’ny fianakaviamben’ny zandarimariam-pirenena, ary efa hatry ny ela no fantatra fa misedra olana. Fialana bala, araka ny fomba firesaka no nisokajian’ny mpanara-baovao izao fihetsiky ny komandy ambonin’ny zandarimariam-pirenena izao. Azo adika koa anefa izao fihetsiky ny jeneraly Bruno Wilfrid izao, fa efa tena sarotra ny toe-draharaha, ka mba tsy hanan-tsiny dia aleo, mangina na misintaka kely mihitsy aloha. Efa fomba fanao ihany moa izany ho an’ny tompon’andraikitra ambony sasany. Tsotra mantsy ny valin-teny amin’izay, rehefa anontanian’ny mpanao gazety na ny mpanao fanadihadiana any aoriana hoe : «tsy teto an-toerana aho tamin’io fotoana io, ary efa nisy tompon’andraikitra nisolo toerana vonjimaika ahy tao». Azo vinavinaina avy amin’izany tranga rehetra izany koa anefa fa efa manomboka tsy to-teny eo amin’ireo olona feheziny intsony ity lehiben’ny zandarimariam-pirenena ity, ka naleony nanaja tena, toy izay hitsanga-menatra tsy hisy mankato sy mpanaraka intsony. 

Tia Tanindrazana

Samia mijoro ho an'i Gasikara.