Edito

Nidofotra ny �Plan B�

Edito
Zoma 07 Mey 2010

Tsy tafavoaka ny baolina. Tsy hanolotra miaramila ho ao anatin’ny governemanta iarahan’ny sivily sy miaramila ny foloalindahy, araka ny fanambarana niarahan’ny lehiben’ny Etamazaoro miaramila, ny jeneraly Ndriarijaona André sy ny kaomandy ambonin’ny zandarimariam-pirenena, ny jeneraly Razafindrakoto Bruno Wilfrid. Nanipika anefa izy ireo fa amin’ny maha olom-pirenena ny miaramila dia tsy manakana raha misy ilan’ny fanjakana azy izy ireo. Ny lojikan’ny fanambarana nataon’ny foloalindahy ny 12 aprily, nangataka tamin’i Andry Rajoelina ny sori-dalana mazava sy ny hoenti-manana izany, sy ny 06 mey nanehoan’izy ireo ny fanapahan-keviny dia mazava fa tsy naharesy lahatra ny foloalindahy ilay sori-dalana. Karazan’ny tsipaka ambavafo ho an’i Andry Rajoelina ihany iny, izy izay niandrandra fa hanohana ny “Plan B” ny foloalindahy. Toa mieritreritra paikady hafa indray i Andry Rajoelina sy ireo mpanolotsaina azy vokatr’izany. Araka ny tsiliantsofina re dia mety hivadi-dela (tahaka ny fanaony) indray ato ho ato ny filohan’ny FAT, ka hanaiky ny hifampidinika amin’ireo lehiben’ny ankolafy telo sy ny mpanelanelana. Iaraha-mahita mantsy ankehitriny fa vahaolana miteraka olana iray vaovao foana no avoakan’ny tetezamitan-dRajoelina ka vao mainka mampitombo ny fahorian’ny firenena sy ny vahoaka.

RTT