Edito

Partagé sur :
• facebook

Koa raha ny mpiasam-panjakana aza moa no efa miaiky fa toy ny mihantsy azy ireo hanao fihetsiketsehana ny fitondrana ka mampanahy sao tetika hanemorana fifidianana izany, tsy aleo koa ve mivonona amin’izay mety hitranga indray isika mianankavy ?

Mivonona mba ho tonga tompon’andraikitra amin’ny fisorohana ireo fahazaran-dratsin’ny manampahefana hatramin’ny taona 1959 dia ny tsy hiverenan’ny hala-bato mampiaiky izao tontolo izao intsony. Mivonona amin’ny fandraisan’anjara amin’ny fifidianana mba ho anisan’ny hanan-jo hitabataba raha sanatria tsikaritra ho tsy mandeha amin’izay laoniny ny dingana tokony narahana rehetra mandritr’izao taom-pifidianana izao mandra-pahatongan’ny fivoahan’ny vokatra rehetra. Rahampitso sisa no fetra farany ahafahana manamarina  ny anarana ao anaty lisitra ary niarahan’ny rehetra nahatsikaritra fa fohy dia fohy izay 1 volana izay kanefa dia olona hitantana antsika mandritry ny 5 taona be izao no hofidiana. Etsy an-kilany anefa ny fampielezankevitra mialoha ny fotoana manomboka mirarakompana. Midika aloha io fa samy miaiky ny ankamaroany hoe tsy ampy hahafantarana olona 1 ihany koa ny 1 volana monja hampielezankevitra amin’ny fomba ofisialy afaka 11 volana eo ho eo. Ny antsojay isan-karazany koa dia mbola mampahatsiahy ny efa nisy hatramin’izay ihany. Tsy mba hisy mpitondra ho sahy hiaiky ho tsy nahavita azy mihitsy izany eto ka hametra-pialana am-pahendrena fa na dia efa hita izao aza fa fihemorana sy fahantrana miavosa no manao tohivakana dia mbola lazaina ho fisandratana ihany.

J. Mirija  

Tia Tanindrazana

Samia mijoro ho an'i Gasikara.