Edito

Miverimberina ny tantara

Edito
Alatsinainy 12 Jona 2017

Izay tokoa angaha no maha voasokajy ho tany an-dalam-pandrosoana ny tany an-dalam-pandrosoana.

Asa moa raha mbola mitombina ho antsika io fanasokajiana io fa ny mampametra-panontaniana matetika ankehitriny dia hoe an-dalam-pandrosoana sa tsy mandroso sa an-dalam-pihemorana mihitsy no sokajy azo hametrahana ity firenena ity amin’izao toe-draharaha miseho ankehitriny izao ? Ho an’ny tany mandroso rehetra dia « mitohy ny tantara » satria mazava ho azy fa ny fikatsahana ny fandrosoana amin’ny alalan’ny asa tsy ilana fandokafan-tena fa voatsaran’ny vahoaka amin’ny hitan’ny masony sy miharihary hatrany no iainana. Ho an’ireo firenena izay tsy toy izany kosa dia mitombina mihitsy ilay fanamarihana hoe « miverimberina ny tantara » satria dia ny zava-niseho efa hita tany amin’ny 30 taona lasa mahery ihany no mbola tazana amin’ny endriny hafa aty amin’ny taon-jaton’ny fahazavana aty. Vao izao ve moa no nisy fakana an-keriny misesisesy nialoha fifidianana ? Vao izao ve no nisy fitokonan’ny mpiasam-panjakana sy ny mpianatry ny oniversite ? Vao izao ve no nisy ireny tsy fietezan-javatra marobe tabatabain’ny olona isan’andro ireny ? Miverimberina ny tantara ratsy saingy irariana mba tsy ho sanatria ho lasa fomba amam-panao.

Mirija