Edito

Mivelona amin’ny fanantenana

Edito
Alakamisy 17 Aogositra 2017

Mivelona amin’ny fanantenana ny mino, hoy ny lohahevitry ny fiangonana iray anisan’ny lehibe eto Madagasikara, iray volana lasa izay.

“Ny fanantenana no hiveloman’ireo bado”, hoy kosa ny oha-pitenenana frantsay. Na ilay ohatra voalohany na ilay faharoa dia samy maneho fa mahavelona ny fanantenana. Mahavelona manao ahoana anefa ? Amin’ilay maharitra ve sa ilay mampitsipozipozy ? Anjaran’ny tsirairay no mamaly azy. An-taonany maro izao dia saika fampanantenana hatrany no nampiainan’ireo mpitondra nifandimby ny vahoaka teto. Mpitondra iray koa io omaly io no nampanantena indray tahaka izay efa nampanantena rehetra teo alohany fa imasoana amin’izay ny ady amin’ity kolikoly mandifotra sy mambotry ny firenena ity. Raha ny zava-misy anefa dia nihemotra hatrany ny laharantsika teo amin’ny sehatra iraisam-pirenena teo amin’ny ady amin’ny kolikoly ity. Enga anie hivadika tokoa ny tantara ato ho ato !

J. Mirija