Edito

Mitifi-danitra

Edito
Alarobia 09 Aogositra 2017

Manomboka ny hazakazaka amin’ny fifidianana filoham-pirenena ho avy eo. Efa maro ny milaza fa hirotsaka, saingy any amin’ny ora farany no hitsarana hoe tena sahy tokoa sa mitsapa ny halalin’ny rano

. Tsy sanatria manamaivana na manambany, fa toa samy miteny sy milaza ho vonona daholo izay afaka miteny na dia efa misy ihany aza no tsikaritra fa na sefom-pokontany aza mety tsy ho lany. Ao ny miezaka hatrany mikopak’afo sy mampalaza tena aloha sitrany ahay mba mahazo 2 na 3 isan-jato angamba rehefa raikitra tokoa ny tokoa. Tsy manamaivana na mitsara ivelany fa vao any amin’ny resaka haitarika sy tsanganana ny sasany dia efa hita taratra fa tsy hahovoka, ary misy mihitsy aza no efa nirotsaka tamin’ny alalan’ny antoko nosokajiana ho matanjaka, saingy 5% angamba raha be indrindra, ka tanteraka ny ohabolan’ny Malagasy hoe arakara-tarehy voa-javatra. Ao ny manana tombondahiny mihitsy, ka afaka mampiely ny foto-keviny dieny izao noho ny fananana orinasan-tserasera, ary toa malalaka amin’ny fanamavoana sy fanaratsiana ny hafa, saingy mbola tsy mety misongadina e ! Toa ilay antsoina hoe mitifitra lanitra hahavoazana tendrombohitra sisa fomba fiadin’ny ankamaroany, fa ny hibata ny fandresena dia efa hita taratra eny ihany. Sitrany ahay tokoa angamba lasa minisitra na tendrena amina toerana ambonimbony atsy ho atsy.

Toky R