Edito

Misy ny vola !

Edito
Alarobia 06 Jolay 2011

Tsy hita intsony izay atao fa dia sahirana ny Malagasy ary tsy mahatafavoaka ny baolina ny FAT. Izay no teny fohy mahafehy ny zava-misy ankehitriny.

Etsy ankilan’izay dia mbola mikiribiby ny FAT fa hoe mahavita mamaha ny krizy, hono, izy ireo. Tsy mety mahay mandray lesona mihitsy ireo milaza azy fa manampahefana amin’izao fotoana na dia efa maro ihany aza ireo fambara mipoitra etsy sy eroa, na dia ireo nivavaka tamin’ny FAT roa taona asa aza izay efa tonga saina ka manomboka manakiana ampahibemaso ny zavatra tsy mety ataon’izao fitondrana izao. Ohatra iray amin’ireny ny fanakianana mavaivay ny praiminisitra nataon’i Zakahely Boniface, tao amin’ny Kongresy Tsimbazaza. Notsoriny fa tsy mahafeno ny fepetra amin’ny maha praiminisitry ny fampihavanam-pirenena azy ny jeneraly Camille Vital satria miandany amin’ny ankolafy Rajoelina no sady efa nisolotena ity Ankolafy ity tamin’ny dinika politika sasany natao tany ivelany, izy rahateo moa dia notendren’i Andry Rajoelina ary tsy nanontaniana ny hevitry ny antoko politika izany fa resaka fotsiny no betsaka… Manomboka mipoitra etsy sy eroa indray tato ho ato ny fitokonana, nisantatra an’io ny teny amin’ny ladoany noho ny fampiatoana amin’ny asany ilay “Receveur”-n’ny ladoany tao Toamasina. Manamafy ireo mpiasa fa tsy rariny izao mitranga izao. Nahoana hoy ny solontenan’izy ireo no avela mivezivezy an-kalalahana ireo tena atidoha mikotrika ny fanapahana sy fanondranana ny “bois de rose” fa ireo olona tafiditra tsy nahy na tratry ny tsindry bokotra no ampidirina am-ponja. Fantatra ihany koa fa efa mihetsiketsika ny mpitsara sasany any ambadimbadika any fa hilaza ny tsy rariny eo amin’ny tontolon’ny fitsarana sy ny teny midina, kanefa dradradradraina fa hoe mahaleotena ny fitsarana malagasy. Dia holazaina indray ve avy eo fa nisy nanakarama mba hanakorontana ireny olona milaza ny marina sy ny tsy rariny ireny ka manakorontana ny firenena ? Be loatra ny tsy fetezana eto ary efa tena sangy mihoatra ny loha araka ny fitenenana no ataon’ny FAT.

Ny tena mahasorena ny olom-pirenena tsotra dia ny mahita ireo olona ambonimbony midehaka eran’ny tanàna amin’ny fiara lafo vidy, no sady efa be hatoka avokoa izy rehetra, hita mihitsy hoe miadana satria misy ny vola ; ny trano sy «villa» amin’izany miroborobo fatratra ny fanorenana azy ary rehefa anontaniana sy hadihadiana ireo orinasa mpanao trano dia manamafy fa olona ambony avokoa no tompon’izy ireny ary tsy miandriandry izany mihitsy ny asa fa ezahana atao haingana. Misy tsinona ny vola ka ! Ary ny mahagaga na dia efa nisy fanambarana ofisialy tamin’ny filankevitry ny minisitra aza ny amin’ny hifehezana ny vola mivoaka dia mbola maro ihany ireo mpikambana ao amn’ny governemanta sy ny olona ambony no manao fitsidiham-paritra manararaotra izao andro iraisam-pirenena isan-karazany izao. Ny asa vita ny propagandy mandeha ihany no sady afaka mifaly miaraka amin’ny akama, misy tsinona ny vola ka ! Fa ahoana kosa ny vahoaka fahanan-dalitra isan’andro ? Omena fampanantenana poakaty ? Hanamboarana hopitaly manara-penitra satria azo antoka fa tsy ho salama atsy ho atsy ? Adinodino indray izao ny resaka dahalo mpangalatra omby, fa ny trafikana boaderôzy indray no mahoraka, mihena ny fahaizan’ny zaza malagasy, mitombo ny tsy an’asa. Dia mbola sahy miteny ihany ny FAT fa mety ny fiainana, hatao ny fifidianana na manaiky na tsia ny avy any ivelany, misy tsinona ny vola ka !

RTT