Edito

Partagé sur :
• facebook

Fitarainana atsy, fitakiana aroa, moa va misy mihaino ? Efa dila izay ny 2 taona sy tapany nisian’ity fitondrana ity kanefa dia tsy mitsaha-mitombo ireo karazam-pimenomenomana avy amina vondrona, olon-tsotra,

fikambanana sy sendika ary antoko politika samihafa mitabataba fa tsy miaina ara-dalàna noho ny afitsok’izao fitondrana mijoro izao. Na ireo mba naniry ny tsy hitsikera azy aza moa ity tsy naharitra intsony ary niaiky fa tsy rariny ny zava-misy ataon’ny fitondrana mijoro ankehitriny. Vao andro vitsy no norarana mba tsy hampiditra mpangalatra ao an-trano kanefa toy ny mpamosavy malemy indray ity no sary hita ka ny ao an-trano ihany no haripaka. Mandeha ny fiangaviana, ny fangatahana, nilela-paladia sisa tsy natao fa dia mbola mitombina hatrany ny fanontaniana hoe misy mihaino ? Asa, izay tokoa angamba no efa raiki-tapisaka ao an-doha hoe haninona eo anefa ireo ? Rehefa reraka ve tsy hangina ? Ny zavatra tsikaritra aloha dia zaran’ireo vahiny aza mijanona eto satria mahazo vahana lavitra izy ireo raha mihoatra ny mihary any amin’ny taniny. Azy rahateo, hoy ireo manampahaizana, ny 99%-n’ny harentsika. Dia  tsy mbola ho tonga saina ihany ve hoe ilaina ovana haingana ny fomba fitantanana ny firenena ? Ny firenena niara-dia tamintsika anie izao efa mahavita halaviran-dalana 100 kilaometatra isan’ora e ! Ny antsika ity 100 metatra ihany nefa samy mahazo vatsin-dalana izao ihany !

Faralahimatoa                                          

Tia Tanindrazana

Samia mijoro ho an'i Gasikara.