Edito

Partagé sur :
• facebook

Mahasadaikatra ny fihetsiky ny sehatra iraisam-pirenena manoloana ny toe-draharaha eto Madagasikara, indrindra fa ny fodian’ny filoha teo aloha Marc Ravalomanana. Ny tondrozotra nosoniavin’ireo vondrona politika 10 ary neken’ny sehatra iraisam-pirenena anefa no nanambara tao amin’ny andininy faha-20 fa afaka mody an-kalalahana eto Madagasikara ity filoha teo aloha ity

. Nanaiky nilefitra nandritra ny 2 taona sy tapany ingahy Ravalomanana sy ireo malagasy maro be mbola miandrandra azy hanavotra ny firenena. Na ny fitondrana tetezamita na ny fitondrana vaovao nijoro taorian’ny fifidianana na ny sehatra iraisam-pirenena, tompon-kevitra tamin’ny tondrozotra sy ilay fifidianana anefa dia samy nody fanina tamin’ny fodian’ity filoha teo aloha ity teto Madagasikara. Fandrirarirana no betsaka, fanomezan-toky mipoapoaka, fampanantenana isaky ny mihetsika fa tsy nety tafiditra teto Madagasikara ihany i Dada. Vita ny fifidianana, nilamina, tsy nisy fifamonoana tahaka ny mahazatra tany Afrika, tsy mbola navela niditra teto ihany anefa i Dada. Misy fetrany ihany ny fandeferana, koa dia nikaroka hevitra mba hahatongavany teto izy, hevitra izay azo antoka fa fantatry ny sehatra iraisam-pirenena tsara, saingy mody fanina hatrany izy ireo. Dia indro fa mivoaka indray ny fanambarana diplaomatika, manaboribory resaka sy manome rariny hatrany ny mpitondra. Tsy azo ekena ny fanimbazimbana ny hasin’ny maha malagasy antsika, hoy Atoa Marc Ravalomanana teny Faravohitra raha nitafa tamin’ny mpanao gazety izy ny alatsinainy lasa teo. Misy antony goavana izay teny izay satria tena misy mihitsy ireo mitady hanimba ny sain’ny Malagasy. Tsy fotoanan’ny fanjanahantany intsony anefa izao ary adidin’ny Malagasy ihany koa ny mijoro manohitra ny teti-dratsy ketrehan’ny sasany any ambadibadika any mba hametsena hatrany ny Malagasy.

Tia Tanindrazana

Samia mijoro ho an'i Gasikara.