Edito

Mipararetra ry kanosa

Edito
Alarobia 13 Desambra 2017

Niezinezina ny fanambaran’ny filoha teo aloha Marc Ravalomanana omaly ny fahavononany sy firosoany hatrany hanarina an’i Madagasikara, ary izay no niadiany mafy ny hiverenenany teto Madagasikara.

Tenin-dehilahy vonona sy sahy izany, ary efa teny nomena ny vahoaka, ka tsy maintsy tanterahina. Tsy natao handranitana ny hafa na hambolena korontana eto amin’ny firenena, fa kosa velirano hoenti-maneho fa adidy tsy maintsy hatao ny fanarenana an’i Madagasikara, izay efa tena potika sy rotiky ny hetraketraky ny maty eritreritra sy ny mpamadika tanindrazana. Inona kosa no mety ho setriny avy amin’ireo mihevi-tena ho mafy sy mbola te higoka ny tsirom-pahefana, ka hitady izay fomba rehetra hijanonana eo na hisy faty olona aza? Misy miala ao Mavoloha, hoy ny horakoraky ny tolona fahiny satria dia vao mainka mipararetra indray ry kanosa sy tsy mahatoky valera, ka manahy mafy ny ho very seza. Ny anaran’ny sasany aza moa dia efa zary antsoin’ny olona hoe “Rabekonetaka” noho izay hakanosana sy tsy fahatokisan-tena ara-politika io satria fantany tsara ny nataony, ary tsy hahazo sitraka amin-dRamalagasy intsony izy. Mbola hinia hanao herim-boangory, ka hihantsy ady sy hamboly korontana sa mba ho tonga saina sy hahay hanaja tena aloha? Ny tantara no hitsara!

Toky R