Edito

Milavo lefona !

Edito
Alakamisy 08 Jona 2017

Samy maka ho azy sy samy manao izay danin’ny kibon’ny sisa eto amin’ny firenena fa tsy misy intsony izany lalàna ifampifezana izy.

Toa misy ihany ny lalàna saingy mandeha ilaha tahaka ny kiraron’i Beminahy, hoy ny fitenenana, ka misy ambony sy ambanin’ny lalàna. Ireo mijoro handravona ny fitanilana aza tsy fantatra intsony na mba tena miezaka mitaky ny hitovian’ny rehetra na manao sinema araka ny fahitan’ny besinimaro azy. Tsy manan-kianteherana intsony ny valalabemandry fa dia ny ody varatr’i mopera sisa hoe ny aza mba vohany ihany satria mibanabana ho an’ny valala tsy mandady harona ny eny Ambanintsinana sy Ambalatavoahangy. Efa tena milavo lefona sy tsy manan-kianteherana intsony ny maro an’isa. Halavirina toy ny fasam-bao kosa izany ho an’ireo lava tànana sy lohany eto amin’ny tany ama-monina, ka na inona na inona daozin’izany fandikan-dalàna izany dia tsy misy bety, hoy ny tanora satria HVM. Tsy tambo hisaina ny fanambaran’ny filoha sy ny praiminisitra sy ny maro hafa, saingy ny teo ihany no teo fa dia volan-kakafotra e! Tsy hay aloha na mba ho mby hatraiza indray ny fitakian’ny mpitsara sy ny namany amin’ny fanajana ny fahefan’izy ireo fa ny hita aloha dia tsy manan-kianteherana intsony ny maro an’isa fa milavo lefona sy mitazana avy ety ivelany sisa!

Toky R