Edito

Milavo lefona

Edito
Zoma 06 Aogositra 2010

Raha mbola krizy politika koa tsy nisy toy ity novolen’ny Fahefana Avon’ny Tetezamita ity teto Madagasikara. Fanonganam-panjakana no niandohany. Daty malaza raiketin’ny tantara ny 17 martsa 2009. Io rahateo no fanonganam-panjakana voalohany nitranga teto Madagasikara, fa hetsi-bahoaka no nisy ankoatra izay, tao anatin’ny 50 taona niverenan’ny fahaleovantenam-pirenena izay. Mihitsoka ny fiainam-pirenena. Mila hitoka-monina i Madagasikara. Tsy voafehin’ny mpitondra mahefa ny raharaha. Tsy misy fitantanana mandeha amin’izay laoniny eto. Mamono afo sisa asan’ny mpitondra. Raha mba miravondravona ny olana etsy dia mipoitra indray ny aroa. Tsy misy vahaolana maharitra.

Tsy ny hamaha izay olana izay koa anefa no mahamaika ny mpitondra eo, fa ny hijanonana eo amin’ny fitondrana aza no mampiasa loha azy ireo. Ampirimina any am-ponja ireo tsy mitovy hevitra aminy. Ampihorohoroana sy rahonana izay mbola mitabataba. Dia mandeha ny lazon’ady. Milavo lefona izay tsy mahazaka, manaiky ny fanonganam-panjakana sy ny famotehana ny firenena sy ny zava-doza rehetra naterak’izany ary ka dia manatevin-daharana ny mpanompo ny mpitondra. Hany ka toa teny fandatsana ny Malagasy sisa ny hoe : fitiavan-tanindrazana sy hambompom-pirenena, fa efa nandohalika hozanahina indray !

Jean D.