Edito

Miharatsy ny tantara

Edito
Sabotsy 26 Aogositra 2017

Ny teo aloha tsy mety hangarahara, ny aty aoriana mampitombo ny endrika efa ratsy ananan’ny firenena.

Na inona na inona laza ratsy efa nananan’ilay vahiny nisy namono teny Tsaralalana dia mitoetra foana ao anatin’ny tantaram-pirenena fa masoivoho vahiny niasa teto amintsika teo aloha iny. Na nalaza ho atidoha nikotrika fakana an-keriny maro hatrany amin’ny taona 2010 izy na efa nisy fotoana nidina teny Antanimora dia tsy maintsy hataon’ny eo anivon’ny sehatra iraisam-pirenena ny fitsarana, indrindra fa ny firenena niavian’iny olona iny dia azo antoka fa miha manjaka andro aman’alina ny tsy fandriampahalemana eto Madagasikara. Efa nisy teratany vahiny hafa maromaro, raha tsiahivina, no maty nisy namono teto, toy ny tany Nosy be. Saika isan’andro no manjaka ny asan-dahalo any amin’ireo faritra be omby ary miampy asan-jiolahy koa amin’izao fotoana. Tsy misy firenena afaka mandroso tsy ao anaty fandriampahalemana anefa. Averin’ireo mpitondra matetika izany. Efa tsy haintsika ny mitantana ny harentsika. Dia inona sisa izany no antenaina ?

J. Mirija