Edito

Mifampiandry kendritohana !

Edito
Alatsinainy 30 Oktobra 2017

Hatraiza no hiafaran’ity raharaha famarotana ny toerana misy ny trano fonenan’ny Filoha teo aloha ity ?

Mifanilika ny mpitantana teo aloha sy ny ankehitriny, izay fianakaviambe iray ihany tany am-piandohana saingy nampiadian’ny ady tombontsoa sy fahefana. Ny mahagaga sy mahatalanjona, dia nandrasana ho faty ilay raiamandreny be, izay vao napoaka ho fanta-bahoaka ny afera. Fa nahoana no tsy napoitra hatramin’izay ? Sa kosa mba ho fakana ny fon’ny mpanara-dia ity Raiamandreny efa lasa nodimandry ity hanohana ny vondrom-pahefana avy atsy na avy aroa no tanjona ? Maro ny ankifonofono eto amin’ny firenena, ary miseho hatrany ny fifampiandrasana kendritohana amina resaka afera maizina. Efa miseho ny resaka ampamoaka isan-karazany ankehitriny, ary mbola maro no zavatra tsy ampoizin’ny rehetra atsy ho atsy. Antomotra tokoa ny fifidianana, ka samy manao izay fomba rehetra hahazoany fandresena. Anisan’ny tena fomba fiadin’ny mpanao politika eto amintsika ny fifamakian’ny mpiray tendro teo aloha ny afera maloto niaraha-nanao, ary porofon’izany ny zava-misy ankehitriny. Efa tena ao anatin’ny ady mafana isika izao, ary miandry ny ampamoaka manaraka mikasika ny hagegen’ny mpitondra indray.

Toky R