Edito

Miesona ny vahoaka

Edito
Zoma 15 Jolay 2016

Efa tena tsy hay intsony izay endri-pitantanana misy eto Madagasikara ankehitriny.

Mbola manana ny hasiny ihany ve ny parlemanta sa baiko midina avy any amin’ny fiadidiana ny repoblika sy ny governemanta no raisiny ? Misolotena ny vahoaka marina ve ny solombavambahoaka sa miaro ny antokony sy ny tombotsoany fotsiny ? Mba tena manana vina hanatanterahana asa hanarenana ny firenena sy hanasoavana ny vahoaka marina ve ny governemanta sa mandany volam-panjakana sy mitsetsitra famatsiam-bola fotsiny ? Eo amin’ny resaka fandriampahalemana moa dia tena very fanahy mbola velona ny olona, indrindra fa ireo miaina any ambanivohitra satria tena manao izay tiany ary efa tsy matahotra mpitandro ny filaminana intsony ny olon-dratsy. Zava-manahiran-tsaina hafa manampy trotraka izany rehetra izany ny fahasosoran’ny Malagasy manoloana ireo vahiny mahazo tany etsy sy eroa, tsy fantatra intsony na ara-dalàna na tsia fa dia manana taratasy aloha izy ireo. Tsy misy mihitsy ve ny fitsinjovana ny Malagasy fa ny hafa foana no mahazo avara-patana satria mahatolotolotra be angamba e !

RTT