Edito

Miantso fanaratsiana

Edito
Sabotsy 29 Jolay 2017

Mahagaga ihany raha ny eo anivon’ny fitondram-panjakana amin’izao fotoana izao no mamerimberina matetika fa tsy fotoanan’ny fifanaratsiana intsony izao.

Mba mijery ny antony mahatonga izay fanaratsian’ireo ankolafin-kery lazainy ho misakana ny lalany izay ny fitondrana ankehitriny ? Tsy efa nilaza avokoa ve ny sokajin’olona rehetra na mpanao politika io na mpandraharaha na olon-tsotra sy mpandinika raharaham-pirenena fa tsy mihaino ny tsikera atao aminy ary mila mianatra mihaino izany ny filoham-pirenena ? Tsy ny mpitondra ihany ve no miantso fanaratsiana ho an’ny tenany, raha ny zava-mitranga, hitan’izao tontolo izao afitsony no resahana ? Ny fahalalahana hiteny sy maneho hevitra efa mampiady hevitra. Ankehitriny, tsy mbola nisy teto ambonin’ny tany raha tsy teto amintsika ihany izany hoe tandindomin-doza izany ihany koa ny fahalalahana hanao fety na hankalaza tsingerin-taona no marimarina kokoa. Mety hamaly indray ny solontenan’ny fitondrana hoe tsy mbola mitovy amin’ny any ireo firenena jadona no misy eto tahaka ny efa nitenenana solontenana mpitondra fanjakana iray tamin’ny taon-dasa hoe mbola tsy mitovy amin’ny any amin’ny tany hanjakan’ny asa fampihorohoroana ny eto amintsika. Handrasana ho faran’izay ratsy hatrany ve ny toe-draharaha rehetra vao handraisana fepetra ?

J. Mirija