Edito

Partagé sur :
• facebook

Nandresy ny tolon’ny fanjakana HVM tamin’ny fampandaniana ny lalàna mifehy ny fifidianana, izay tsy ankasitrahan’ny maro. Mihevitra izany izao fa mahery sy matanjaka na ara-politika na ara-bola.

 Azo atao hoe nivoaka nandresy tao anatin’ny sarotra ve ny fitondrana ? Na koa azo adika ho fandresena ve ireny zava-nisy ireny ? Na inona na inona aloha, dia mitsanga-menatra hatrany ity fitondrana mpanao amboletra tsy mihevitra izay mety hiafarany ity. Toa efa manomana ny lavaka hilevenana satria na inona na inona aloha paikady maloto hampiasaina eo, dia efa tena mahatofoka ny maro ny afitsok’ity fitondrana ity. Iza no fanjakana tsy nanam-bola sy nirehareha tamin’ny fananana ny tafika teto saingy nirodona sy potika tao anatin’ny fotoana monja ihany. Fomban’ny malemy ny mialokaloka ao anaty lalàna namboamboarina hoenti-manamafy ny seza sy ny fampiasana ny mpitandro ny filaminana ho herim-pamoretana. Toa miantehitra amin’ny hazo boboka ihany raha ny politika efa tsy nitondra soa ho an’ny firenena tahaka izany no ianteherana. Tsy ho fitiavam-bahoaka mihitsy no ho setrin’ny famotehana firenena nataon’ity fitondrana ity, saingy mihevitra ny hampiasa ny herin’ny vola sy ny herim-pamoretana. Raha tena fanjakana nahavita ny adidiny tokoa, tsy hiantehatra amina kajy politika maloto hibabena henatra. Tsy mangeja ny fahalalahan’ny olom-pirenena na kandida io na vahoaka mifidy, fa havela hilatsaka izay te hilatsaka, tsy verezin-jo ny mpifanandrina. Raha tena mafy sy mahery tokoa dia ny ady amin’ny fahantrana sy ny olam-bahoaka no laharam-pahamehana, fa tsy ny ady amin’ny fiarovan-tseza efa hita fa tsy hahomby sy mety ho afobe handoro ny tena atsy ho atsy e !

Toky R

Tia Tanindrazana

Samia mijoro ho an'i Gasikara.