Edito

Partagé sur :
• facebook

Miakatra ny vidin-tsimentitra. Miakatra ny saran-dalana. Mbola hiakatra misimisy koa ve izany atsy ho atsy ny vidina entana ilaina andavan’andro na PPN?

 Sao dia efa tokony ho paska sy pentekosta ary noely no iantsoana azy satria efa hisondro-bidy atsy ho atsy koa, hoy ny vazivazy mandeha? Miandry sondro-bidy sisa izany ankehitriny ny azon’ny fiarahamonina Malagasy atao manoloana izao toe-draharaha izao. Sanatrian’izany efa ho ny rivotra iainana manontolo mihitsy no hisondro-bidy saingy mampametra-panontaniana hoe efa resy tanteraka ve sa nisafidy ny hijanona ho valalabemandry ka tsy mbola hampiseho fihetsika maha olompirenena mandray andraikitra ihany? Miakatra ny hafanan’ny tany. Simba ny tontolo iainana. Misondrotra avo 10 eny ny loton’ny rivotra iainana ety an-drenivohitra. Efa nisy andiany miisa 25 hafa nialohan’iny COP 26 iny, hoy ny fanontanian’ny mpanao politika iray izay saingy inona no vokany teto ambonin’ity tany ity? Inona no vokany ho an’I Madagasikara manokana? Hampitsahatra anaty fotoana fohy ny doro-tanety sy ny tavy ve ny fiarahan’ny filoham-pirenena naka sary tamin’ireo mpitondra fanjakana amina firenen-dehibe maro tany amin’io fivoriana tany Glasgow io? Ampihena ny filan’ny vahoaka Malagasy tsy mahatakatra vidina entona na “gaz” ny fampiasana arina fandrehitra na saribao ve? Etsy ankilan’izany rehetra izany dia ireny niaraha-nahita sy nandre ireny fa dia ny fanomanana ny taona 2023 izany izao no tena maha seriny izao fitondrana izao. Ny aty ivelan’ny fitondrana koa mampametra-panontaniana hoe inona no antony namoahan’ny praiminisitra iray teo aloha ireny sary fanelanelanana tany Gaborone ireny? Inona no hevi-dalina fonosin’ireny kabarin’ny filoha Hery Rajaonarimampianina ireny? Izay aloha ny anio fa enga anie ho hita ny vahaolana rahampitso !
J. Mirija
 

Tia Tanindrazana

Samia mijoro ho an'i Gasikara.