Edito

Partagé sur :
• facebook

Tsy milamina intsony ny tany ary mbola hihamahery vaika izany atsy ho atsy. Tsy mandondom-baravarana intsony ny fahantrana fa efa ao an-tsoso-koditra ho an-dRamalagasy.

Ny fahafatesana kosa efa eo an-tokonana satria mitatao ny aretin-doza, izay toa sarontsaronana sy ezahina hanaovana fampandriana adrisa. Rehefa tsy eo indray ny aretina, dia mandragaranga ny heriny ihany koa ny dahalo sy ny jiolahy, izay tsy mitsitsy fa mandatsak’aina. Toa mandindona andro aman’alina ny fahafatesana, ary tsy misy mandeha amin’ny laoniny intsony ny zava-drehetra. Mananontanona ihany koa amin’izao fotoana izao ny krizy politika vaovao satria ahiana indray ny korontana amin’ny fifidianana. Mampametra-panontaniana hoe tsy afaka ny hiova mihitsy ve na ny mpitondra na ny vahoaka, fa dia izao hatrany no toa anjara fiainana natokana ho an’ny Malagasy ? Zary mifanome tsiny lava eto isika, fa toa tsy misy mijoro ho tena tompon’andraikitra. Ny mpitondra sy ny mpanao politika tia tena sy tsy manao afa tsy mangoron-karena. Ny vahoaka toa tsy tan-dalàna sy mandrora mitsilany, ka manao izay saim-patany. Miainga amin’ny fahatongavan-tsainy tsirairay ny fampandrosoana, fa tsy hisy fahagagana izany eto, raha mbola hifaninana hamotika sy hanao izay saim-patany, toy ny fanjakam-boalavo eto isika. Tsy hisy fiadanana sy fiandrianana azo hantenaina, fa miandry fahafatesana ara-bakiteny no atao eto.

Toky R

Tia Tanindrazana

Samia mijoro ho an'i Gasikara.