Edito

Miaka-midina

Edito
Alakamisy 14 Janoary 2016

Nanapa-kevitra ny fitondram-panjakana fa hoferany indray ny vidin-tsolika eto Madagasikara manomboka izao rehefa navela hampihatra ilay vidiny tena izy teo aloha ireo kaompanian-tsolika 4 misy eto amintsika.

Izany no natao moa, araka ny fanazavana voaray dia mba hisorohana ny mety ho fidangan’ny vidin-tsolika be loatra. Eo no tsy mazava amin’ny rehetra satria eo amin’ny tsena iraisam-pirenena anie ka efa tato anatin’ny enim-bolana izao no midina foana ny vidin’ny solika e ! Tany Frantsa aza mialoha ny faran’ny taona 2015 teo dia nampidinina mihitsy ny vidin’ny gazoala. Fa nahoana moa no mbola ahiana hidangana be foana ny vidin-tsolika eto Madagasikara ? Ny fanjakana rahateo efa nanaiky fa tsy hanao « subvention » intsony. Ka inona indray ity fihetsiketsehana vaovao ity ? Na tsy nisy an’io fepetra io aza mantsy dia tokony hidina ho azy ny vidin-tsolika noho ilay fidinan’ny vidiny eo amin’ny tsena iraisam-pirenena. Ireo karazana haba sy hetra no ambaran’ireo mpandraharaha fa tena mampidangana ny vidin-tsolika eto amintsika. Mankaiza daholo ireny vola ireny anefa avy eo ? Ary rehefa tapitra ilay enim-bolana hameran’ny fanjakana ny vidin-tsolika, dia inona indray no mety hitranga ? Hafahafa ny zava-misy eto Madagasikara. Toa raisina tampotampoka sy noho ny kajy maimaika fotsiny ny fanapahan-kevitra hitantanana ny firenena fa tsy misy vina lavitr’ezaka mihitsy.

RTT